Maharashtra Education: राज्यात पहिली ते नववीच्या वार्षिक परीक्षा एप्रिल अखेरीस घेण्याचा निर्णय शिक्षण विभागाने घेतला असला, तरी यामुळे शाळांचे पूर्ण वेळापत्रक विस्कळीत होण्याची भीती निर्माण झाली आहे. विशेषतः दहावीच्या विद्यार्थ्यांसाठी हा बदल मोठ्या अडचणी निर्माण करणारा ठरतो आहे.
एप्रिल महिन्यात घेतली जाणारी दहावीची विशेष शिकवणी आणि पुढील शैक्षणिक वर्षाच्या तयारीसाठी केले जाणारे नियोजन यावर याचा थेट परिणाम होणार आहे. त्यामुळे विद्यार्थी, शिक्षक आणि पालकांमध्ये नाराजी आहे.
Maharashtra Education
शालेय शिक्षणात दहावी हा अत्यंत महत्त्वाचा टप्पा मानला जातो. बहुतांश शाळांमध्ये मार्च महिन्यात नववीची परीक्षा झाल्यानंतर एप्रिलच्या पहिल्या पंधरवड्यात दहावीच्या काही विषयांचा अभ्यासक्रम शिकवला जातो. यामुळे विद्यार्थ्यांना जूनमध्ये नव्या शैक्षणिक वर्षाची सुरुवात करताना फायदा होतो.
मात्र, यंदा पहिली ते नववीच्या परीक्षा २५ एप्रिलपर्यंत चालणार असल्याने हे नियोजन कोलमडणार आहे. अशा परिस्थितीत दहावीच्या विद्यार्थ्यांना उन्हाळी सुटीत कोणतीही विशेष तयारी करता येणार नाही.
निकाल आणि उत्तरपत्रिका तपासणीबाबत चिंता
शिक्षण विभागाने २५ एप्रिलला परीक्षा संपवण्याचा निर्णय घेतला असून, १ मेपासून उन्हाळी सुटी लागू होण्याचे संकेत आहेत. मात्र, सर्व इयत्तांच्या परीक्षा २५ एप्रिलला संपल्यानंतर अवघ्या चार-पाच दिवसांत उत्तरपत्रिका तपासून निकाल जाहीर करणे शिक्षकांसाठी अत्यंत कठीण होणार आहे.
सहसा प्रत्येक वर्गासाठी निकाल तयार करण्यास काही आठवड्यांचा कालावधी लागतो. परंतु, यंदा वेळ कमी असल्याने शिक्षकांवर अतिरिक्त ताण पडणार आहे.
हेही वाचा:-👇
SSC HSC Result: दहावी-बारावी बोर्डाचा निकाल कधी लागणार? संभाव्य तारीख जाहीर!
दहावी-बारावी परीक्षांचे वेळापत्रक आणि अभ्यासक्रमावर परिणाम
यंदा दहावी आणि बारावीच्या परीक्षा दहा दिवस आधी घेतल्या जात असल्याने विद्यार्थ्यांना उजळणीसाठी कमी वेळ मिळेल. परिणामी, पुढील शैक्षणिक वर्षातही हा ताण कायम राहील. शिक्षक संघटनांचे मत आहे की, अभ्यासक्रम पूर्ण करण्यासाठी फेब्रुवारीपर्यंत शिकवणी संपवावी लागेल, मात्र हे प्रत्यक्षात शक्य होईल का, याबाबत साशंकता आहे.
राज्याध्यक्ष, खासगी मुख्याध्यापक महासंघाचे प्रकाश सोनवणे यांनी स्पष्टपणे सांगितले की, “हा बदल पुढील दोन वर्षांपासून लागू करावा. सध्याच्या शैक्षणिक वर्षासाठी जुने वेळापत्रकच ठेवावे. अन्यथा विद्यार्थ्यांचे मोठे नुकसान होईल.”
नव्या वेळापत्रकामुळे राज्यभरात शिक्षक, पालक आणि विद्यार्थी संभ्रमात आहेत. वर्षानुवर्षे ठरलेल्या परीक्षांच्या वेळा अचानक बदलल्याने अभ्यासक्रमाचे नियोजन बिघडले आहे. विशेषतः दहावीच्या विद्यार्थ्यांना याचा मोठा फटका बसण्याची शक्यता आहे. परिणामी, हा निर्णय फेरविचार करून पुढील दोन वर्षांपासून लागू करावा, अशी मागणी केली जात आहे.